Заменик Претседателот на Владата задолжен за европски прашања, Бујар Османи oоствари средба со Министерот за надворешни работи и трговија на Унгарија, Петар Сијарто.
Двајцата соговорници заеднички потенцираа дека Македонија и Унгарија имаат одлични билатерални односи и плодна соработка и дека двете земји остануваат посветени на јакнењето на меѓусебните односи и продлабочување на соработката во сферите од заеднички интерес.
Вицепремиерот Османи и министерот Сијарто, исто така, се осврнаа и на европската и евроатлантската интеграција на Македонија, при што Османи изрази благодарност и задоволство од досегашната принципиелна и гласна поддршка на Унгарија за нашата земја, како во рамките на Европската Унија, така и во рамките на земјите од Вишеградската група.
„2018 година претставува историска можност за Македонија да направи значаен исчекор во приближувањето кон Европската Унија и НАТО“. Во оваа смисла континуираната поддршка од страна на Унгарија претставува важен поттик за европската перспектива на Македонија„ – истакна Османи на средбата. Тој додаде дека Македонија ќе ги испорача сите реформи кои ги има преземено како обврска за откочување на евроинтегративните процеси, истакнувајќи ја притоа и намерата позитивно да пристапи во разрешувањето на сите отворени политички прашања.