Немаме резервна татковина, Охрид не го даваме, Грујо оди си, Бранко врати се, Немаме страв од закани ваши, никој од вас не се плаши, народ се буди, слобода се раѓа, пазете луѓе владата ќе паѓа. Извикувајки ги овие пароли неколку стотина граѓани денес низ охридската чаршија ги продолжија протестите на опозицијата против актуелните случувања во земјава.
„Ние младите не заслужуваме да живееме во страв, не заслужуваме поделби, ниту преродба во сто медиумски кампањи. Ние не сме наивни, ние знаеме што сакаме.Младите од Охрид сакаме бунт бидејки не можеме да ве трпиме господо од власта. Сакаме да го продолжиме патот по кој со многу маки и страдања оделе нашите браќа, сетри, татковци и мајки, патот кон европска Македонија“ се обрати Томчо Алексовски претставник на младите.
Градоначалникот на Охрид Александар Петрески рече дека сега се решени да одат до крај и оти тоа денес му го пренел и на Амбасадорот на САД во Скопје, со кого имал средба.
„Одиме до крај, затоа што враќање назад нема. Ние во минатото премолчивме многу и гледаме наместо да имаме поголема демократија имаме се поголема диктатура. Кога ја затворија А1 телевизија, рековме со тоа ќе се заврши. Го затворија Велија Рамковски, се случи убиството на Мартин од најблиските обезбедувачи на Груевски, но овде не застанаа, го уапсија Љубе Бошковски. Ги купија сите телевизии што постојат во Македонија. Но она што се случи на црниот понеделник, тоа не можеме да го заборавиме. Затоа што ако и тоа го заборавиме нивниот крај не се знае, бидејки секоја диктатура во светот се рани со уште поголема диктатура. “ рече Петрески.
Петрески ги повика охриѓани во сабота масовно да заминат во Скопје, на протесниот марш низ улиците на главниот град, а во исто време да го посетат Латас и МТВ.
„Ќе го посетиме Сител за да го поздравиме Латас, а исто така ќе ја посетиме и МТВ.Ќе одиме пред овие две телевизии и потоа ќе се вратиме за Охрид„ рече Петрески