Во понеделник и вторник во Брисел, посредникот на ОН во разговорите за прашањето за името меѓу Македонија и Грција, Метју Нимиц ќе се сретне со претставниците на двете земји Васко Наумовски и Адемантиос Василакис.
Оваа средба е дел од напорите на ОН да им помогне на двете страни да најдат заеднички прифатливо решени, најави канцеларијата на Нимиц.
Периодов преовладува подобрена полилитчка клима меѓу Македонија и Грција, па новата рунда преговори следува со оптимистички очекувања од Скопје и Атина, но и до Вашингтон и Брисел за ставање крај на долгогодишниот спор.
Премиерот на Македонија, Зоран Заев изјави дека треба да се направи исчекор и дека сега постојат поголеми шанси од претходно за изнаоѓање решение со Грција.
– Или двете страни ќе бидат подеднакво задоволни или подеднакво незадоволни. Таков е компромисот. Но, верувам дека како политичари, можеме да добиеме повеќе, ако имаме храброст да најдеме решение и да донесеме одлука, отколку да го одложуваме, како што беше случај во минатото, изјави Заев.
Тој изјави дека е полесно да се промени името на еден аеродром отколку на земјата, одговарајќи на тоа кои отстапки е подготвен да ги направи.
И неговиот грчки колега, Алексис Ципрас најави дека во 2018 година очекува позитивни случувања во однос на прашањето со Македонија, доколку Скопје се одлучи на позитивни чекори напред.
– Ако тие се откажат од реториката и изјавите дека се тие единствените потомци на Александар Македонски и од своите иредентистички тврдења, тогаш можеби и би можеле да најдеме некое заедничко решение. Во таков случај јас ќе бидам првиот кој ќе ја гарантира европската перспектива, безбедност и сигурност на соседната земја, порача Ципрас вчера од Белград по средбата со негвоите колеги од Србија, Бугарија и Романија.
Грчкиот министер за надворешни работи, Никос Коѕијас претходно кажа дека очекува прашањето да се реши во првата половина на наредната година и решението мора да биде компромис, што ќе го отвори патот на Македонија кон ЕУ и другите организации.
Оптимизам преовладува и во Вашингтон и Брисел. Американскиот заменик помошник државен секретар Хојт Ји смета дека расположението за решавање е досега на највисоко ниво, додека еврокомесарот Јоханес Хан изјави дека очекува во првата половина на 2018 година да се најде политичко решение.
Добра волја за решение кај двете страни гледа и медијаторот Нимиц, кој во изјава за Независната Балканска новинска агенција – ИБНА, изрази и надеж дека ќе бидат надминати и т.н. црвени линии поставени од Атина и Скопје.
И медиумите во Грција коментираат дека средбата на Нимиц со преставниците на двете земји во Брисел, е знак за континуитетот на позитивната клима, која се создаде во односите меѓу двете земји по промената на власта во Македонија. Како временска рамка која го придвижува решавањето на спорот и постигнување заемно прифатливо решение, се посочува следниот самит на НАТО, што треба да се одржи на 11 и 12 јули во Брисел, а на кој Македонија се надева дека конечно ќе се отвори патот да стане членка на Алијансата.
Грчките медиуми најавуваат и дека е можно Нимиц на средбата во Брисел да излезе и со нов предлог за името.