Собранието на Република Македонија денеска ја одржува 21. седница. Пратениците го донесоа дополнувањето на измените и дополнувањата на Законот за сметководство за буџетите и буџетските корисници, а за другите точки на дневниот ред ќе одлучуваат во продолжението закажано за 15 часот.
Пред усвојувањето на дневниот ред во процедурална забелешка Илија Димовски од ВМРО-ДПМНЕ повторно побара тргање на европското знаме од Предлог-законот за употреба на јазиците и одржување на јавна расправа за законот. Подоцна побара предлог-одлуката за јавна расправа која од нив била доставена до претседателот на Собранието Талат Џафери да биде ставена на гласање, но таа беше отфрлена.
Димовски од говорницата рече дека со својата вчерашна изјава еврокомесарот Јоханес Хан му посочил на владејачкото мнозинство дека го злоупотребиле европското знаменце ставајќи го на законот за употреба на јазиците за да ги скрати сите дебати, дискусии и расправи дури и деведесетте амандмани поднесени за текстот. Според него, Хан индиректно посочил и дека оваа постапка воопшто нема никаква врска со приоритетите на Република Македонија за побрзо зачленување во Европската унија и НАТО.