Новиот градоначални на Прилеп Илија Јованоски денеска по применото решение од ОИК за градоначалник и примопредавањето на функцијата од поранешниот градоначалник Марјан Ристески, одржа средба со граѓанските здруженија и занаетчии, како и со граѓани кои ќе го сочинуваат Граѓанскиот парламент. Функција на Граѓанскиот парламент ќе биде да предлага, а општината да ги разгледува идеите и решенијата за одредени проблеми на градот.
– Граѓанскиот парламент ќе функционира како тело со претставници од сите области и барем еднаш месечно ќе се состанува. Предлозите и идеите сериозно ќе се разгледуваат и ќе се поставува приоритет за нивна реализација. Стручни лица ќе оценуваат како може да се рализираат и со каква финансиска конструкција. Но, уште сега може да кажам дека приоритет во градот ќе имаат водоснабдувањето и инфраструктурата, рече Јованоски.
За утре е закажана конститутивната седница на Советот на општина Прилеп на која што ќе бидат верификувани 27-те мандати на членовите на Советот. СДСМ и коалицијата освои 15, а ВМРО-ДПМНЕ и коалицијата имаат 12 советнички мандати. На седницата ќе биде избран и новиот претседател на Советот.