Укинувањето на визниот режим за Мексико би било од особено значење за продлабочување на односите меѓу двете земји со оглед дека Македонија ги укина визите за мексиканските граѓани, а комуникацијата може дополнително да се олесни и со назначување почесен конзул на Мексико во Македонија, истакна претседателот на Собранието на Република Македонија Талат Џафери на билатералната средба со претседателот на Сенатот на Мексико Ернесто Кордеро Аројо на маргините на 137. Собрание на Интерпарламентарната унија (ИПУ) во Санкт Петербург.
Аројо се согласи дека билатералните односи и соработката меѓу Република Македонија и Мексико бележат позитивен развој, но и дека има доволно простор за нивно натамошно продлабочување.
Тој воедно го покани Џафери да дојде во официјална посета на Мексико.
Двајцата соговорници, како што соопшти Кабинетот на Џафери, изразија задоволство од оваа прва официјална средба меѓу претседатели на двата парламента и од можноста за размена на мислења за продлабочување на соработката.
Претседателот на Собранието на РМ констатира дека и покрај големата географска оддалеченост, постои можност за зацврстување на меѓупарламентарната соработка на мултилатерално ниво во рамки на Интерпарламентарната унија, како и на билатерално ниво. Информира дека е веќе формирана Пратеничка група за соработка со парламентите на земјите од Латинска Америка и Карибите.
Истовремено нагласи дека Делегацијата на Собранието на Република Македонија ќе ја поддржи кандидатурата на сенаторката Куевас Барон за претседател на ИПУ, со оглед на нејзината биографија и богатото меѓународно искуство, како во рамките на Интерпарламентарната унија така и во другите меѓупарламентарни собранија.
За Мексико е од голема важност Куевас Барон, која присуствуваше на средбата, да биде избрана за претседател на Интерпарламентарната унија. Како што подвлече Аројо, сенаторката ја има поддршката на двата дома на Конгресот и на Владата на Мексико.
Куевас Барон потенцира дека како претседател на Комисијата за надворешни односи во Мексиканскиот сенат ќе се заложи за интензивирање на соработката меѓу двата парламента и за укинување на визите за влез во Мексико за граѓаните на Република Македонија.
На крајот на средбата, претседателите на парламентите се согласија дека со промовирање на парламентарната дипломатија, ќе се отвори можност за продлабочување на билатералните односи меѓу Република Македонија и Мексико, како на парламентарен план, така и во сите области.