Регионот на ЈИЕ има можност во процесот на придружување кон ЕУ да ги искористи европските фондови за итно подобрување на сегашната состојба на транспортните коридори, оцени Исток Селјак, координатор на „Едисон“ и потпретседател на Управниот одбор на Самит 100.
– Треба да ја направиме Европа во регионот пред официјалното влегување на земјите од ЈИЕ во ЕУ преку отвореност едни кон други. Регионот на некој начин е во подобра позиција од членките на ЕУ и разликите меѓу нас можат да ни бидат предност ако добро се здружиме, изјави Селјак.
Тој посочи дека светот се наоѓа пред нова економска револуција за брзо преоѓање од посилно базирана на без посилно базирана економија на иднината.
– Таа транзиција ќе се случува во идните 10-15 години со поддршка на дигитализацијата. Составен дел на тоа е зелената и електрична мобилност. Регионот може повторно да доцни на нешто што е на самиот почеток, а имаме и можност да се поставиме како лидери на тој сегмент што е императив на Самитот, рече Селјак.
Токму затоа, додаде, е формирана платформата „Едисон“ (еко драјвинг иновејтинг солушнс енд нетворк) која, како што кажа, има за цел да го претвори регионот во лабораторија на идната зелена мобилност.
– „Едисон“ веќе здружува 50 компании, универзитети и институти во Словенија, а сега се проширува и низ цела ЈИЕ преку концептот „Едисон е-сити“ со лансирање на инфраструктура на полначи за електрични зелени возила, зелени такси, кар шеринг, а сакаме да ја поттикнеме и индустријата и производството да ја искористи „Едисон“ за нови иновативни решенија и зелен коридор од Љубљана до Скопје, Приштина и Тирана во должина од 1.400 километри.
Претседателот на Управниот одбор на Самит 100 и генерален директор на „Алкалоид“ АД Скопје Живко Мукаетов потенцираше дека е важно што се стартува со проектот „Едисон“ и информира дека веќе се работи што побргу да се направат законски решенија што ќе го следат овој проект. Проектите како овој, како и можностите од одржувањето на Самитот ќе има огромен бенефит, смета Мукаетов, посочувајќи на предизвиците со задржување на стоката на одредени гранични премини, но и немањето директна поврзаност и линија со Сараево и Подгорица, како значајни пазари. Неопходно е, како што рече, и хармонизација на одредени закони во регионот за побрз проток на стоки, но и на луѓето.
– Нам ни е од интерес да оди побргу и протокот на луѓе бидејќи реално се соочуваме со потреба од одредени кадри. Сметам дека во регионот тоа може да се хармонизира и да се поедностави за да можеме да сметаме на тие кадри, рече Мукаетов.