Билатерални политички консултации помеѓу Министерството за надворешни работи на Србија и Министерството за надворешни работи на Македонија се одржаа денеска во Белград, соопштија од српското МНР.
Од српската страна консултациите ги водеше државниот секретар Немања Стевановиќ, а од македонска страна – државниот секретар Виктор Димовски.
Консултациите беа можност да се разгледа моменталната состојба на севкупните билатерални односи меѓу Србија и Македонија, како и да се идентификуваат можностите и насоките за натамошен развој со акцент на економска соработка.
Во разговорите е изразена заемна подготвеност за натамошно унапредување на билатералните односи и соработка во сите области од заеднички интерес, пред се во областа на економијата, транспортот, инфраструктурата и туризмот.
За време на консултациите двете страни разменија мислења и за најважните регионални и меѓународни теми.
Беше договорено следните билатерални консултации да се одржат напролет 2018 година во Скопје, соопштуваат од српското МНР.
Како што е веќе најавено, во ноември се очекува официјална посета на македонскиот премиер Зоран Заев на Белград.