Каратистите на Макпетрол претстојниот викенд ќе настапат на силен интернационален турнир во Риека. На турнирот своето учество го потврдија 1.650 каратисти и каратистки од 26 држави од целиот свет, во повеќе возрасни категории.
Тренерот Бошко Заборски изјави дека „макпетролци“ подготвени одат на турнирот и додаде дека ова за нив претставува последна проверка пред настапот на Светското првенство, посебно за репрезентативците Петар Заборски, Моника Пендаровска и Анѓела Мојсовска, кои во втората половина на октомври треба да заминат за Тенерифе, Шпанија.
– На овој турнир одиме да го постигнеме тоа што го имаме зацртано. Најважно е да успееме да ја темпираме формата на нашите кандидати кои треба да земат учество на Светското младинско првенство кое ќе биде во Тенерифе, Шпанија, и ова секако дека претставува последна шанса тие да се сретнат со претставници на својата возрасна категорија постари јуниори-ки (У21). Турнирите од Светската Премиер карате лига се само за сениори-ки, и од таа причина ние како клуб одлучивме дека нашите спортисти треба да имаат средба и со нивните врсници од младинските состави на 26 држави, изјави Заборски.