СДСМ со писмено соопштение реагира на изјавата на Дафина Стојаноска од ВМРО-ДПМНЕ на тема здравство.
„Лицемерна и лажна е загриженоста на ВМРО-ДПМНЕ за состојбата во здравството, бидејќи сите ги чувствуваат последиците од катастрофалните штети што ВМРО-ДПМНЕ ги направи во здравствениот систем. Никола Груевски, Никола Тодоров и ВМРО-ДПМНЕ оставија пустош во здравството, руинирани болници, понижени пациенти и лекари, неупотреблива опрема и огромни долгови на здравствените установи.
Поради криминалното и расипничко владеење на Тодоров и Груевски, сите здравствени установи во Македонија тонеа во милионски долгови. Клиничкиот центар во Скопје должи 3 милиони евра, бидејќи цели 10 години не се плаќале сметки за вода, а Градската општа болница „8ми септември“ има вкупен долг од 5 милиони евра.
Владата предводена од СДСМ стави крај на таквото криминално, коруптивно и расипничко работење во здравството. Преку кратењето на непродуктивните трошоци за луксуз, барок, споменици и криминални тендери, се ослободија повеќе пари со кои се санираат штетните последици од владеењето на ВМРО-ДПМНЕ и се спроведуваат мерки што го опоравуваат и унапредуваат здравствениот систем во интерес на сите граѓани“ се вели во реакцијата на СДСМ.
