Самостојна изложба „Од традицијата“ на академскиот сликар и професор Решат Амети денеска ќе биде отворена во Чифте амам во Скопје во рамки на манифестацијата Нов културен бран.
Изложбата, како што е најавено, ќе ја отвори директорот на Националната галерија на Македонија Дита Старова Ќерими. Таа е дел од манифестацијата по повод отворањето на плоштадот Скендербег и ќе трае до 16 септември.
На изложбата ќе бидат претставени повеќе дела во комбинирана техника и масло на платно од циклусот насловен „Од традицијата“.
Решат Амети е роден во Гостивар (1964), дипломирал на Факултетот за ликовни уметности во Скопје 1989 година во класата на професорот Ана Темкова, а дипломската работа ја одбранил кај професорот Ристо Калчевски.
Добитник е на многу награди и признанија како наградата за сликарство „Лазар Личеноски“ од ДЛУМ – 2009 година, „11 Октомври“ за животно дело од областа на уметноста и културата во 2013 година. Учесник е на многу ликовни колонии во државата и надвор од неа.