Условите под кои Грција го добива пакетот на меѓународна помош се толку катастрофални што мораат да бидат одбиени, рече лидерот на левичарската партија Сираза, Алексиси Ципрас.
Тој го повтори своето ветување дека ќе го прекине договорот со меѓународните кредитори од кои Грција добива милијарди евра.
„Договорот за помош е веќе минато и ќе остане таму од понеделник, денот по изборите“, изјави тој и додаде дека „процесот на мирната револуција е во тек“.
СИРИЗА беше втора по бројот на гласови на изборите кои се случија на 6. мај и има големи шанси да победи на престојните. Нејзиниот лидер вели дека мерките за штедење наметнати на Атина како помош, ќе ја одведат Грција во пропаст.
Ако Грција не го исполни ветувањето за намалувањето трошоците на буџетот и реформата во економијата, останатите европски земји и Меѓународниот монетарен фонд кои ја поддржуваат, би можеле да се откажат, по што ќе мора да се напушти еврозоната.
Ципрас се надева дека ќе ги убеди европските лидери дека таквото сценарио претставува најголемата закана за натамошното постоење на заедничката европска валута.
По изборите на 6. мај ниту една партија не успеа да формира влада, ниту пак дадоа резултат преговорите за широката коалиција. Затоа и се распишаа нови избори на 17. јуни.
Агенцијата за истражување на јавното мислење предвидува дека најголем број гласови ќе освои конзервативната Нова демократија и СИРИЗА.
Овие избори се клучни за останувањето на Грција во еврозоната.