Градоначалникот на Град Скопје Коце Трајановски, денеска им ги врачи признанијата на годинашниве добитници на наградите во четири категории од манифестацијата „Новогодишните бои на Скопје 2012“, најубаво украсен угостителски објект, семејна куќа, тераса и двор на средно училиште.
Најубаво украсен објект е кафулето „ГЕТ –КАФЕ“ на улица „Сава Ковачевиќ“ бр.47Б во Кисела Вода, а најубаво украсена семејна куќа е куќата на Марјан Михајловски, на улица „Таки Даскало“ бр.4А во населба Драчево. Најубаво украсена тераса е терасата на Филип Нечевски на бул. „АВНОЈ“ бр.26/15 во населба Аеродром, додека најубаво украсен двор на средно училиштен е на СУГС „Димитар Влахов“.
– Град Скопје ја продолжува традицијата на стимулирање на граѓаните и фирмите за украсување на своите објекти со што Скопје добива поубав предновогодишен лик, рече Трајановски.
Спонзори на манифестацијата „Новогодишните бои на Скопје“ се ЕВН Македонија и компанијата за увоз и продажба на моторни масла и филтри „Фас Вас“ од Скопје.
Игор Гиевски од ЕВН Македонија истакна дека четрврти пат се дел од манифестацијата „Новогодишните бои на Скопје“ и им честиташе на добитниците.
Град Скопје и годинава обезбеди парични награди во вредност од 10.000 денари, што им ги додели Трајановски. Фирмата за увоз и продажба на моторни масла и филтри „Фас Вас“ ДООЕЛ од Скопје на победниците во првите три категории им додели ваучери во вредност од 2.000 денари, а ЕВН Македонија еднократно ги ослободи победниците во сите категории од плаќање на сметката за потрошена електрична енергија за декември 2012 година. За наградите одлучуваа комисии составени од медиумски претставници.