Притисокот кон вработените во АД „Македонска пошта“ не престанува. По убедувањата на раководството преку потпишување на вонсудски договори вработените да ги повлечат тужбите за неисплатениот регрес од неколку години наназад, следи нов „обид“ на менаџерскиот тим да ги убедат вработените да го сторат тоа.
Од раководството на Пошта овој пат спремиле изјава и полномошно кое вработените треба да го потпишат со што ќе ги овластат Главниот повереник на Синдикалната организација и Претседателот на Синдикатот на Македонска пошта да ги преставуваат вработените пред надлежниот суд и во преговорите со менаџерскиот тим на Пошта.
Вработените велат дека синдикатите всушност се на страната на раководството, а против нив, па со полномошното кое најверојатно ќе го добијат на сила и со притисок врз работниците, синдикатите ќе ги повлечат тужбите на вработените кон АД „Македонска пошта“ и ќе се договорат со раководството за услови кои не им одговараат на вработените.
-Целта е да се повлечат тужбите и на вработените да им се даде смешен регрес од 6000 денари за една година и тоа на рати. Зошто да не се дадат сите од еднаш место да се сецкаат, не разбирам, вели Бранка Корева, која пред една година се пензионирала од АД „Македонска пошта“.
Во поглед на односот на Синдикатот кон вработените, Корева вели дека Синдикатот застанува зад правата и интересите на вработените, но само за одредени лица. За лошиот однос на раководството кон „непослушните“, вработените не се жалеле бидејќи како што велат, нема каде односно нема таков кој ќе ги слушне и ќе им помогне.
-Има случаи каде Синдикатот воопшто не е заинтересиран за луѓето што работат во компанијата. Јас сум отидена во инвалидска пензија, не ме прашаа ни како сум, а не па нешто друго да помогнат. Мојата инвалидска пензија е од никаквите услови во кои работиме, среќна сум што останав жива, вели Корева.
Виктор Јованов