Реформите во ВМРО-ДПМНЕ се неминовни. Суштински статутарни реформи се неопходни. Во таа насока промовираме конкретни измени во Статутот на ВМРО-ДПМНЕ, рече Илија Илијоски, член на иницијативата за реформи во ВМРО-ДПМНЕ.
Тој објасни дека статутарните измени водат кон демократизација и деизолација на партијата и најпрво мора во целост да ги редефинираат надлежностите и начинот на избор на постоечките органи во партијата.
– Статутарните измени треба да воспостават нови органи во партијата на општинско ниво, преку кои партијата ќе се децентрализира и ќе се зајакне учеството на поширокот членство во одлучувањето, особено при кадровската политика. Измените на Статутот треба да ја вратат вистинската улога на Центарлниот комитет на партијата. Тој орган е гласот на членството, рече Илијоски.
Тој побара конституирање на нов орган, Собрание на општински комитет на ВМРО-ДПМНЕ. Овој орган би бил составен од непосредно избрани претседатели на месни комитети од страна на членови на партијата како претставници на стручните комисии на општинските комитети.
– Централниот комитет на партијата мора да биде движечка сила и партиски мотор на целата организација. Форум на кој слободно ќе се разминуваат мислења и ставови на непосредно избрани претставници од општинските комитети од целата држава и ќе се дефинираат политиките на партијата, рече Илијоски.
Тој рече дека ова се само дел од предлозите за кои реформаторите веруваат дека ќе ја зајакнат внатрепартиската демократија и ќе ја вратат моќта на партијата во рацете на членовите.
Александар Тодески