Министерот задолжен за дијаспората, Едмонд Адеми денеска во Женева се сретна со амбасадорoт Вилијам Лејси Свинг, генерален директор на Меѓународната организација за миграција.
Адеми, соопшти неговиот Кабинет, го запознал амбасадорот Свинг со чекорите кои ќе бидат преземени поврзани со дијаспората и ја истакнал потребата од заедничка соработка, имајќи го предвид искуството на ИОМ со проекти поврзани токму со дијаспората .
На средбата министерот Адеми го запознал генералниот директор на ИОМ, амбасадорот Свинг, со програмата и активностите на новата Влада на Република Македонија, се заблагодарил за досегашната соработка и поддршка на ИОМ за Република Македонија и ја изразил поддршката на Владата за активностите на ИOM на регионално и на глобално ниво.
Генералниот директор на ИОМ, амбасадорот Свинг ја поздравил одлуката, односите со дијаспората да ги подигне на повисоко ниво преку министер задолжен за дијаспора и изразил подготвеност да ја поддржи Владата во активностите на техничко и советодавно ниво.
Исто така била разгледана можноста Република Македонија во 2018 година да биде домаќин на Самит на министри за дијаспора.