Синоќа во Центарот за култура „Антон Панов“ беше отворена четвртата самостојна изложба на фотографии на струмичанецот Сречко Гунчев. Пред љубителите на фотографијата изложени се дваесетина дела инспирирани од животот.
– Животот, секојдневието, сцената која е пред мене во театарот каде работам, природата, езерата, планините, цвеќињата, овошјето, животните, обичните луѓе и се она што го опкружува, ми создава предизвик за фотографирање, вели Гунчев.
Вели дека ја користи секоја можност што му се нуди. Смета дека фотографирањето не е платно што сликарот го поставува на штафелајот, туку сцени, ситуации кои се случуваат брзо и неповторливо.
Сречко Гунчев е еден од најпознатите струмички урбани фотографи. Најзаслужен е и за дигиталното архивирање на фотографии од историјата на градот и жителите на Струмица. Во неговата фото-архива има раритетни фотографии кои потекнуваат од далечното минато, а се поврзани со Струмица и струмичани.