Невладини организации од пограничниот регион на Македонија и Бугарија изработуваат заедничка интегрирана политика за нискојаглеродна економија во прекуграничниот регион.
Со ИПА средства организациите „Амброзија“ од Пехчево и „Кластер на обновливи извори на енергија“ од Благоевград, на првата работилница во Пехчево и Делчево, работеа на воспоставување рамка за креирање политики за борба со климатските промени во сите девет општини кои се вклучени во проектот.
Јасмина Пашалиска-Андонова од „Амброзија“, потенцираше дека учесниците работеле во 4 групи: енергетика, земјоделие, шумарство и отпад и отпадни води, при што биле дефинирани главните проблеми и приоритети во рамки на секоја област и визијата за подобрување на емисиите на стакленички гасови.
– Целите на работилницата вклучуваа и презентирање на постигнатите резултати од истражувањето на емисиите на стакленички гасови во општините Пехчево, Делчево, Берово и Виница од Македонија и Благоевград, Симитли, Струмјани, Сандански и Кресна, од Бугарија. Потоа запознавање на учесниците со климатските промени, можностите за нивно ублажување, прилагодување кон нив, како и глобалните напори во борбата против климатските промени, но и воспоставување рамка за креирање на политики за борба со климатските промени во сите општини кои се вклучени во проектот и запознавање со искуствата во спроведување на проекти за ублажување на климатските промени во македонските општини, истакна Пашалиска-Андонова.
Додаде дека се реализирала и посета на објекти и локации во општините Делчево, Пехчево и Берово кои имаат позитивни практики во поглед на намалување на јаглеродните емисии и искористување на обновливи извори на енергија.
На работилницата учествуваа претставници на општинските администрации, јавните институции, бизнис заедницата и невладините организации од сите девет општини. Паралелно со овие активности се реализира и мониторинг на воздухот во општините кои се дел од проектот. Резултатите и насоките за подобрување на состојбата ќе бидат дел од Заедничката политика за ниско јаглеродна економија.