Грчкиот премиер Алексис Ципрас бара од европските кредитори да донесат одлуки, со кои ќе се зголеми довербата на инвеститорите кон економијата на земјата, јави ДПА, која се осврнува на денешната изјава на Ципрас од европската средба организирана во Атина од фондацијата „Кондордија“.
Ципрас смета дека само на таков начин е можно да бидат надминати несогласувањата меѓу Меѓународниот монетарен фонд и земјите од еврозоната.
– Европа треба да имплементира конкретни инвестициски програми во Грција, кои ќе создадат работни места и во пракса ќе се надминат разликите, нагласи тој.
Грчкиот премиер смета дека ако Европејците се ангажираат со инвестиции во Грција, тогаш може да ги надмине несогласувањата со ММФ за нејзиниот долг.
ДПА цитира аналитичари, кои се запознати со ситуацијата во Атина, кои овие зборови на Ципрас ги толкуваат како решение за олеснување на грчкиот долг.
Грција во јули има итна потреба од свежи пари во рамки на тековниот спасувачки пакет за враќање на нејзините стари долгови.
Еврогрупата ќе заседава за ова прашање на 15 јуни.