Новото раководство на Македонскиот полициски синдикат (МПС) вчера имало работна средба со министерот за внатрешни работи Агим Нухиу на која биле информирани за состојбите и активностите на Министерството поврзани со настаните од 27 април 2017 година во Собранието на РМ.
Како што соопштија од МПС, тие побарале од министерот темелно, правично и законско постапување за секој случај поединечно, како и неисклучување на командната одговорност поврзана со настаните.
– Исто така побарано е мерката отстранување – суспензија од работното место, која е негово дискреционо овластување, да не се применува како правило и поединечно да се преиспитаат веќе донесените решенија за отстранување, како и да ја искористи својата позиција за да побара дисциплинските комисии што побргу да заседаваат и побргу да се решат случаите поврзани со колегите кои веќе се отстранети од работните места, се истакнува во соопштението на МПС.
Нухиу ги информирал дека формирал работна група со задача објективно и целосно утврдување на фактичката состојба поврзана споменатите настани и дека се поканети и членовите на МПС да присуствуваат на состаноците на Работната група.
Во однос на сите други актуелни прашања за вработените во МВР Нухиу побарал истите да се отворат со идниот министер.