Со случајно активирање програма за гаснење малициозен софтвер, 22-годишен компјутерски техничар од Велика Британија успеа да запре хакерски напади врз установи и фирми во стотина држави во светот. Британскиот „компјутерџија“, идентификуван на интернет само како МалверТек (MalwareTech) откри дека софтверот со кој може да се запре нападот е со регистрирање изменето име на сајтот, објави Гардијан.
– Тоа не е готово. Напаѓачите ќе разберат како сме ги запреле, ќе го променат кодот и тогаш повторно ќе се обидат, нагласи тој.
Тој апелира до корисниците на ОС Виндоус да ги ажурираат своите системи за да не им бидат „запленети“ и да не мора да им плаќаат на напаѓачите.
Европол нагласи дека во тек е кибер напад „без преседан“, а компанијата Мајкрософт презеде необичен чекор нудејќи заради безбедност, и ажурирање на застарени верзии на својот ОС Виндоус. Мајкрософт пред завчерашните напади направи исправки само за постарите системи како што е Виндоус ХП од 2001 година и тие се бесплатни за сите корисници.
Нападите биле засновани на ранливоста на Виндоус. Мајкрософт објави дополнителни исправки во март, но компјутерите во кои не се вградени се предмет на нападот.
Малициозната програма преку мејл, блутут врска или на други начини влегува во компјутерските програми, ја користи таа слабост на софтверот и брзо се шири, како што им се случи во британските болници.
Француската полиција соопшти за над 75 илјади „заробени“ компјутерски системи во светот, од кои најмногу се погодени европски држави меѓу кои и Русија.
Преку уфрлениот вирус WannaCry за повторно пристапување до податоците се бараат 300 долари по компјутер во виртуелна банкнота Биткоин.
Меѓу погодените се и Германската железница кои соопштија дека има проблеми во сообраќајот. Радио Словенија јави дека фабриката на француски Рено во Ново Место од петокот не работи поради тој напад, а неколку напади се пријавени и од граѓани на државата.