Вкупно сто жители на Крива Паланка и Ранковце заклучно со вчера, до кога траеше рокот, пријавиле штети на земјоделските култури од пролетните мразеви.
– Комисијата направи увид на терен кај 30 отсто од поднесените барања и ја утврди штетата на овошните насади. Во претстојниот период ќе се врши увид и кај останатите производители кои поднеле барања, изјави Влатко Ристовски, советник во Подрачна канцеларија на Агенцијата за поттикнување и развој на земјоделството и член на Комисијата за утврдување штети.
Земјоделците ги пријавуваа штетите од ниските температури и мразот што ја зафатија Македонија на 21 и 22 април годинава.
Откако комплетно ќе го заврши увидот, општинската комисија ќе изготви елаборат и ќе го достави до Советот на општината кој, по усвојување на Советот ќе биде испратен на разгледување и одлучување во Владата.