Американскиот претседател Доналд Трамп ги оцени неговите први 100 денови на функцијата шеф на државата како „многу продуктивни“ и им порача на своите приврзаници во Пенсилванија дека „големите битки“ кои го чекаат ќе бидат извојувани.
Во својот говор Трамп ги нападна медиумите и својот претходник Барак Обама, изразувајќи ја поддршката за американската индустрија и војската, својата позиција во надворешната политика и го повтори своето мото „Да ја направиме Америка повторно голема“.
Тој истакна дека ја избрал Пенсилванија за одржување на собир, бидејќи сакал да биде подалеку од Вашингтон, каде синоќа се одржувала традиционална годишна вечера на здружението на известувачи од Белата куќа.
Нагласувајќи дека е воодушевен што е далеку од „вашингтонското мочуриште“ и „здодевната вечера“, американскиот претседател им се потсмевал на „лажните вести“ на Си-Ен-Ен и на „неуспешниот“ Њујорк тајмс.
– Тие се срам, изјави Трамп.
Тој додаде дека потпишал голем број извршни наредби, оценувајќи дека бил „многу продуктивен“ и покрај „хаосот“ кој му го оставиле администрацијата на Обама.
Трамп го изрази својот цврст став ком миграцијата и радикалните исламистички терористи, за кои нагласи дека ќе ги држи подалеку од Америка.
Зборувајќи за кинескиот колега Си Џинпинг, тој призна дека се откажал од етикетирање на Кина како манипулатор, додавајќи дека е потребна флексибилност бидејќи Џинпинг е добар човек кој се обидува да му помогне околу Северна Кореја.
Американскиот претседател потенцираше и дека неговата администрација овозможила околу 180.000 нови работни места.