Во 2016 година бројот на паркиралишта и гаражи, како објекти за паркирање изнесува 254 со површина од 701.194 метри квадратни.
Како што соопшти Државниот завод за статистика, 24.743 места за паркирање се на отворен простор, а 3.905 места за паркирање има во покриените гаражи. Во катните гаражи има 4.966 места за паркирање.
Според податоците на Државниот завод за статистика, во споредба со 2015 година, бројот на паркиралишта и гаражи е зголемен за 1,2 отсто. Во истиот период бројот на местата за паркирање е зголемен за 9,5 отсто, во покриените гаражи зголемувањето изнесува 1,6 отсто, а во катните гаражи бројот на местата за паркирање е зголемен за 2,5 отсто.
Во 2016 година бројот на местата за паркирање на отворен простор за лицата со посебни потреби изнесува 488, во покриените гаражи 69, а бројот на местата за паркирање за лицата со посебни потреби во катните гаражи е 59.
Со ова истражување се опфатени деловните субјекти за јавни паркиралишта во Република Македонија и паркиралиштата на општините.