Полицијата откри 12 нерегистрирани возила, 10 возачи без валидни дозволи и четворица возачи почетници при вчерашните превентивно контролни активности во Тетово и Гостивар, информираше портпаролот на СВР Тетово Марјан Јосифовски.
Посочи дека овие бројки речиси секојдневно се повторуваат во полошкиот регион, а трендот на пораст на овој вид сообраќајни прекршоци е во постојан пораст од минатата година.
– Минатата година на ова подрачје биле откриени вкупно 3.249 нерегистрирани возила. наспроти 1.001 во 2015 година и 2.726 лица без возачка дозвола наспроти 865 во 2015 година, изјави Јосифовски.
Поради ваквите неповолни состојби, Јосифовски уште еднаш го повтори апелот до граѓаните и особено до младите прво да го положат возачкиот испит, па потоа да седнуваат зад волан, но и навреме да ги регистрираат нивните возила бидејќи како што рече Јосифовски не само што ја доведуваат во прашање сопствената туку и безбедноста на другите учесници во сообраќајот, бидејќи нерегистрираните возила најчесто се и технички неисправни, а необучените возачи се потенцијална опасност на патиштата и чести предизвикувачи на сообраќајни несреќи.
Според законските прописи што ја регулират оваа област глобата за управување без возачка дозвола изнесува 300 евра во денарска противвредност, а за нерегистрирани возила од 100 до 500 евра во денарска противвредност. Покрај тоа глоба од 400 евра е предвидена за секој кој ќе му го даде возилото на лице за кое знае дека нема возачка дозвола.