Во штипската населба „Сењак“, која според бројот на жителите е една од поголемите во градот денеска се асфалтираат три улици. Раководителот на Инспекциски наздор во Општина Штип, Тоше Ѓорѓиев рече дека се асфалтираат улиците „Митко Недев“, „Анте Банина“ и „Ванчо Китанов“, а се со вкупна површина од 4.500 метри квадратни. Инвестицијата од два милиони денари е од буџетот на Општина Штип.
– Од овде се селиме со механизацијата за асфалтирање на пристапен пат на спортското игралиште во „Суитлак“, а потоа одиме во населбата „Железничка“, каде што исто така имаме четири улици за асфалтирање, вели Ѓорѓиев.
Тој најави дека викендов градежната механизација ќе ја асфалтира една од најфреквентните улици во градот. Улицата „Борис Кидрич“ која го поврзува централното гардско подрачје со неколку штипски населби и индустрискиот дел во текот на викендов ќе биде затворена за сообраќај, со цел асфалтирањето да се изврши без поголеми проблеми и застој на сообраќајот на останатите сообраќајници во Штип.