Со 12 гласа за советот на Општина Центар ја стопираше одлуката за изградба на улица на кејот на Вардар. Сопствениците на објектите на кејот со аплауз ја поздравија одлуката да се стопира градбата на улица на чие место ќе бидат поставени зеленило, клупи и чешми.
Советниците од ВМРО-ДПМНЕ жестоко се спротивставија на одлуката да не се гради улица. Тие ја побараа скицата за улицата иако таа им беше претходно приложена.
– Образложението за скица од претходните материјали не важи. Немаме скица каде ќе биде улица, а каде пешачка патека, рече Илија Илиовски од ВМРО-ДПМНЕ.
Советниците повторно побараа да им биде кажано дали ќе биде обезбеден влез на итна помош и пожарна, иако и сопствениците на околните кафулиња потврдија дека како досега така и отсега ќе има простор за тие возила.