Некогаш голема радост за најмладите, денес мизерија. Скопскиот Луна парк запоставен од градските власти е претворен во рушевини и шеталиште за кучињата скитници, а во вечерните часови и како место каде можат да се најдат бездомници, алкохоличари и наркомани.
Град Скопје пред две години вети изградба на нов Луна парк вреден 6.5 милиони евра на местото на стариот. Изградбата требаше да започне минатата година, но засега ни трага ни глас од било какви градежни активности во паркот.
-Со ова ќе се изврши целосна промена на старите и дотраени реквизити кои во најголем број не се заменети од последната реконструкција на Луна паркот во 1973 година, најави пред две години, Слободанка Алексовска, член на Советот на Град Скопје од ВМРО-ДПМНЕ.
Со оглед на тоа дека последната реконструкција на Луна паркот е извршена во минатиот век, се доведува во прашање безбедноста на малкуте реквизити кои се уште функционираат.
Посетеноста е драстично намалена, родителите кои денеска го посетија паркот велат дека не се осудуваат да им дозволат на своите деца да се повозат на некои од реквизитите од едноставна причина што со оглед на староста тие не изгледаат доволно безбедно.
Виктор Јованов
