Поранешниот британски премиер Џон Мејџор остро ги критикуваше подготовките на Велика Британија за излегување од Европската унија, нагласувајќи дека Владата треба да понуди „поголема убедливост и помала евтина реторика“, доколку сака да постигне добра спогодба.
Мејџор, кој ја предводеше владата на конзервативците од 1990 до 1997 година ги обвини политичарите, кои го поддржуваат Брегзит дека им создаваат нереални очекувања на Британците за живот надвор од ЕУ.
Во говор во лондонскиот центар за надворешно-политички истражувања „Четам хаус“ поранешниот премиер ја означи како мошне оптимистичка целта на Владата за две години да ги уреди усовите за одвојување од ЕУ и да изгради нови односи со Унијата.
Мејџор нагласи дека на избирачите треба да им се даде поточна претстава за „траењето и сложеноста на големиот настан, кој претстои“.
Тој рече дека постои реална опасност Велика Британија да не добие спогодба за слободна трговија со ЕУ, која Владата ја сака.
Мејџор уште предупреди дека напуштањетпо на 28-члената Унија ќе го ослабне гласот на Велика Британија во светот и ќе ја направи позависна од новиот претседател на САД, Доналд Трамп.