Во текот на викендот непознати вандали искршиле 20 столбови од оградата на пешачката патека покрај реката Брегалница, а сите корпи за отпадоци ги фрлиле во реката. Скршен е мостот на реката Отиња, а оштетени се и повеќе клупи во паркот во населбата Сењак, информираше денеска на прес-конференција директорот на ЈП „Исар“-Штип, Ангел Бојаџиев.
Штетата која ја направиле вандалите изнесува над 2.000 евра.
-Граѓаните макотрпно издвојуваат од своите буџети и даваат пари за плаќање на даноците и ги плаќаат своите сметки редовно, а ние работиме дење и ноќе за граѓаните да можат да се рекреираат на патеките. Но, очигледно на некој тоа не му се допаѓа, а не се свени дека тоа се нивни пари, истакна Бојаџиев.
Тој најави дека случајот ќе го пријават во Полициската станица во Штип и се надева дека истражните органи ќе ги пронајдат сторителите на овој вандалски чин.