САД и Турција ќе го продолжат „целиот спектар на билатералните воени активности и консултации“ и ќе бараат заеднички патишта за натамошно зајакнување на соработката во областа на одбраната во иднина, соопшти денеска Пентагон.
Како што се наведува во соопштението, ова било договорено вчера во Брисел на средбата на министрите за одбрана на САД и Турција, Џејмс Матис и Фикри Ишик.
Матис го потенцирал придонесот на Турција во НАТО и го поздравил транспарентниот дијалог со овој „американски сојузник, кој се соочува со сериозни закани, како во рамки на сопствените граници, така и надвор од нив“.
Тој го уверил својот турски колега во „поддршката на САД за нивниот стратешки партнер Турција во борбата против џихадистичката групација Исламска држава“.
Ишик изјави денеска во Брисел дека началникот на Здружениот генералштаб на Вооружените сили на САД, генерал Џозеф Данфорд ќе пристигне во посета на Турција на разговори во врска со операцијата во Рака.