Градоначалникот на Гевгелија Иван Франгов попладнево упати писмо со барање помош до евроамбасадорот Самуел Жбогар и грчкиот амбасадор во земјава Димитрис Јанакакис за деблокирање на македонско-грчката граница.
Франгов во писмото забележува дека е симптоматично тоа што блокадата е поставена само на границата со Република Македонија, а не и кон другите соседни земји на Грција.
Според него, деблокирањето на Евзони е од интерес на граѓаните, бизнис заедницата и локалните власти во пограничните општини зашто двете страни трпат огромни штети од блокадата.
– Изминативе години нашата општина реализираше повеќе проекти и активности со пограничните општини од Грција преку ИПА програмата на ЕУ и преку непосредни контакти со локалните власти. Ваквата соработка придонесе за подобрување на добрососедските односи ообено во пограничниот регион за што најдобра потврда се веќе реализираните проекти со Пеонија и Килкис и префектурата Пела, нагласува Франгов.
Подвлекува и дека токму поради ова граѓаните и претставниците на бизнис заедницата од двете страни реагираат на повеќедневната блокада на граничниот премин Евзони која го оневзоможува протокот на патници и возила.
Франгов во писмото го замолува Жбогар и Јанакакис, како и сите останати амбасадори во Македонија, во рамките на своите можности да помогнат во деблокирањето на Евзони и нормализирањето на сообраќајот.