Регионалниот центар за соработка „Спектар“ од Крива Паланка во партнерство со здружението „Младински општински совет – Ќустендил” од Бугарија спроведува истражување на тема „Можности и предизвици во обезбедувањето на квалитетни туристички услуги и производи во прекуграничниот регион Бугарија-Македонија”.
– Целта на анкетата и истражувањето е да се процени статусот на туристичките услуги и производи во прекуграничниот регион Бугарија-Македонија и на оваа основа – изготвување на препораки за подобрувања, вклучувајќи ги квалификациите на персоналот, маркетинг и рекламирање, како и претприемништвото во туристичкиот сектор, изјави Методи Цветковски од „Спектар“.
Анкетата е насочена кон претставници на регионалните органи на власта, локалната власт, бизнис секторот, граѓанското општество, образовните и стручните организации, локалното население, како и туристите, посетителите и другите заинтересирани страни.
– При подготовката на проектот беше направено истражување во областа на претприемништвото во двата региони – Ќустендилската област во Бугарија и Североисточниот регион во Македонија и беа констатирани потешкотиите и предностите во областите од двете страни на границата. Врз база на анкетното истражување коешто се спроведува онлајн и ќе трае до 10 февруари, на полноќ, во претстојниот период ќе се спроведат работилници и тркалезни маси на оваа тема, истакна Цветковски.
Истражувањето е дел од проектот „СТЕПС – Поддршка на претприемништвото и популаризирање на услугите во туризмот”, кофинансиран од Европската унија, Бугарија и Македонија преку Програмата ИНТЕРРЕГ-ИПА ПС БГ-МК. Целта на проектот е зголемување на квалитетот на туристичките услуги во прекуграничниот регион преку зголемување на квалификациите и стимулирање на претприемништвото меѓу младите.
– Првата работилница од проектот ќе се одржи на 24 февруари во Ќустендил, а на 25-ти во Крива Паланка. Целна група се младите над 18 години, невработени и студенти, рече Цветковски.
Предвидена е изработка на акциски план за поддршка на туризмот, врз основа на кој подоцна ќе се градат соодвени туристички продукти.