Татко и син се повредени откако биле физички нападнати од страна на три лица на булеварот „Туристичка“ во Охрид.
Двајцата се пренесени и задржани на лекување во Медицинскиот центар во Охрид. Кај 18-годишното момче У.И. констатирано е дека има внатрешно крварање на мозокот, а 44-годишниот У.И. се здобил со телесни повреди.
Полицијата денеска соопшти дека синоќа во 22:50 часот во полициската станица било пријавено нарушување на јавниот ред и мир на булеварот „Туристичка“ по што полициски службеници излегле на местото на настанот каде ги затекнале таткото и синот. Од извршниот разговор со нив е утврдено дека 18-годишното момче, движејќи се со возило, било сопрено од страна на три непознати лица кои почнале да викаат на висок тон и да удираат по возилото, при што го оштетиле предниот браник и го скршиле задното десно стоп светло.
По ова, момчето телефонски му се јавило на таткото, а за кратко време кога поминало покрај кафе бар, го забележал неговиот татко паднат на земја како истите лица го удираат со дрвена летва и железна шипка. Кога момчето тргнало да му помогне на таткото, физички било нападнато, по што трите лица побегнале од местото на настанот.
Од страна на СВР Охрид извршен е увид на местото на настанот и подигнати се предмети за натамошна постапка. Се преземаат мерки за целосно расчистување на случајот.