Наместо конкретни мерки за решавање на проблемот со загадениот воздух кој е особено изразен во населбата Лисиче каде ПМ10 и ПМ 2.5 честичките се далеку над дозволената граница, градоначалникот на Општина Аеродром, Ивица Коневски, гради тениски терени вредни 2 милиони евра.
Градоначалникот Коневски за 7 години владеење не најде решение за загадениот воздух и наместо да инвестира во мерки кои ќе го решат овој проблем, тој инвестира во секакви проекти меѓу кои е и проектот „Рајска градина“ кој наиде на остри критики од страна на граѓанскиот сектор и за кој Коневски одвои 14 милиони евра од буџетот на општината.
Како инвеститор на овие тениски терени се јавува Сергеј Самсоненко за кој се шпекулира дека е продолжена рака на ВМРО-ДПМНЕ која инвестира во спортот во Македонија и покрај тоа што, како што вели самиот Самсоненко, нема никаков бизнис интерес во овие спортски инвестиции.
Тениските терени ќе биде изградени непосредно до хотелот Русија, кој е во сопственост на бизнисменот Самсоненко, и спортскиот центар „Јане Сандански“ кој е исто така инвестиран од страна на рускиот олигарх.
На потпишувањето на овој договор помеѓу Општина Аеродром и приватната фирма која ќе го гради овој тениски комплекс присуствуваше и Министерот за финансии, Кирил Миноски кој рече дека оваа инвестиција ќе допринесе за зголемување на локалниот економски развој.
Виктор Јованов