Во општина Штип денеска гласаа 138 инвалидизирани, болни и изнемоштени лица. Претседателката на ОИК Штип, Сенка Андреева изјави дека гласањето се спроведе без проблеми, а избирачките одбори рано утринава го презедоа и материјалот, со што ги подготвуваат избирачките места за утре, кога треба да ги отворат во седум часот.
– Во општина Штип со право на глас се 38.019 гласачи по Избирачки список, а 3.606 од посебениот избирачки список кои гласаат во странство. Инаку досега е се како што треба и самите избирачки одбори ги земаат своите материјали, паравани, гласачките списоци и печатите и се упатуваат на своето место, каде што го подготвуваат за утрешниот ден за да се отвори во седум часот, рече Андреева.
Во Штип се гласаше и во Казнено поправната установа Затвор-Штип, каде што на гласачкото место 22 91 А право на глас имаат 233 избирачи.
Претседателот на Избирачкиот одбор на гласачкото место 22 91 А, Борис Карлански изјави дека гласачкото место навреме е отворено во седум часот, со што осудените лица од 42 општини можата да го остваруваат своето право на глас до 19 часот.
