Вардар вчеравечер во СЕХА лигата одигра нерешено 28:28, на еден од најтешките терени во Европа, во Веспрем и тоа во драматична завршница. Во таборот на македонскиот првак се задоволни со ремито, а сите пофалби одат за Петар Ангелов.
Тренерот Раул Гонзалес и првиот голман Арпад Штербик, на прес-конференцијата по натпреварот изразија задоволство од освоениот бод и од играта на Вардар. И двајцата се согласија дека одличен во првото полувреме беше Петар Ангелов.
– Честитки за Веспрем, тие се одличен тим. Во првото полувреме почнавме многу добро, Ангелов беше извонреден, а јас задоволен од нашите контри. Среќни сме со резултатот и со првото место на табелата, изјави Раул.
Штербик потсети на неодамнешните лоши искуства од Лигата на шампионите, со Киелце и со Рајн-Некар, потенцирајќи дека поради тоа овој бод е уште поважен.
– Дојдовме во Веспрем по два пораза едноподруго и среќен сум што нашиот тим одигра добар натпревар по тие порази. Сите знаат дека не е лесно да се игра во Веспрем. Резултатот од натпреварот е фер, ние бевме подобри во првото полувреме, а за тоа помогна многу брилијантниот Ангелов. Во второто полувреме Веспрем играше подобро, но успеавме да изедначиме, рече Штербик.
Следниот меч од регионалното натпреварување ракометарите на Вардар го играат в сабота, против Цеље, во Скопје.