Црвена е љубовта која сите ја чувствуваме кон нашава Македонија, црвена е нашата сила за промени во Македонија и црвената ќе го врати животот во Македонија, ја објасни бојата во оваа кампања Радмила Шекеринска вечерва на митингот на СДСМ во Битола.
– Противкандидатите протрчаа преку Битола и не кажаа каде се новите инвестиции, топлификацијата за 55.000 домаќинства, ни филмскиот ни студентскиот град. Единствено нешто што го направија е да го направат иселувањето и најскапиот ученички превоз. Бегаат од вистината како што се трудат да избегаат од одговорноста за сето зло што и го сторија на Македонија. Груевски призна дека стравот му биле истрагите на СЈО, призна дека ако тој се прашува тоа обвинителство утре треба да престане да работи. Бараат власт за да избегаат од затворските казни кои им висат над глава на секој од нив. Затоа гласот за Груевски и за Милошоски е глас за крај на правната држава во Македонија. Глас за Груевски и за Милошоски е глас за амнестија за најкорумпираниот градоначалник што Битола било кога го видела – рече Шекеринска.
Таа нагласи дека СДСМ се обврзува за подобро образование, за социјални служби кои нема да бидат затворен шалтер, за лекари кои ќе лечат, влада во служба на домашните компании, медиуми кои ќе и служат на вистината и судови кои ќе ја бранат правдата.
– Три града, Битола, Скопје, Тетово се во врвот на најзагадени градови во цела Европа. Секој ден по четворица наши сограѓани го губат животот поради загадувањето и владата вели дека за сето тоа нема пари, а има за мерцедеси. Е тоа сакаме да го исправиме. Знам дека многумина во Македонија изгубиле верба во зборовите, ама за нас зборовите се обврска. Тие ни носат валкан или чист образ – додаде таа.
