Полскиот Сејм (Долниот дом на Парламентот) го одобри создавањето на нови воени сили, со кои ќе се завцрсти полската одбрана, што е загрижена за својата безбедност од растечката агресивност на Русија, пренесоа американските медиуми.
Со 269 гласа „за“ и 170 „против“ пратениците го усвоија предлог законот за формирање сили за територијална одбрана, во кои ќе се ангажираат и мажи и жени. Тие ќе бидат дел од полската одбрана, во која се вклучени копнените, военовоздухопловните, военопоморски и специјалните сили.
Законот предвидува новите сили до 2019 година да достигнат бројност од 50.000 лица. Луѓето кои ќе бидат ангажирани во нив ќе исполнуваат логистички мисии и ќе обезбедуваат локации во близина на нивните родни места.
Намената на овие сили за територијална одбрана е да и дадат поддршка на редовната армија во случаи кога Полска е соочена со некоја закана, како и да му помагаат на цивилното население при природни несреќи.