Граѓаните да пријават каков било притисок во текот на изборната кампања, апелира денеска министерот за внатрешни работи Оливер Спасовски од Струмица каде го посети Секторот за внатрешни работи.
Спасовски порача и дека полициските службеници не смеат да учествуваат во ничија партиска кампања, туку напротив, треба сериозно да внимаваат на какви било злоупотреби од државната администрација или од директори на подрачните единици и доколку забележат таков случај, да го процесуираат.
– Заради иднината на Македонија е многу важно да имаме фер и кредибилен изборен процес, а тоа ќе го оствариме само доколку имаме професионално работење од страна на припадниците на МВР од една, и партнерски односи со граѓаните од друга страна, истакна Спасовски.
Посетата на СВР – Струмица е дел од посетите што ги реализира министерот во секторите за внатрешни работи низ државата за одблиску да се запознае со моменталните состојби и проблемите, но и, како што истакна, за уште еднаш да потенцира дека не смее да има никакви притисоци врз граѓаните на престојните избори.