„И покрај сите повици до владините партнери да престанат да манипулираат со Законот за бранители, договорениот хаос продолжува, и тоа за закон за кој на сите им е јасно дека однапред е договорено да не се донесе.
– Ниту претседателот на Собранието, ниту пратениците од владејачкото мнозинство не излегоа со конкретен предлог како да се донесе Законот за бранители и да се одблокира работата на Собранието.
– За жал, сега овој режиран театар доведе до целосна блокада на работата на Комисијата за труд и социјална политика.
– ВМРО ДПМНЕ и ДУИ се владејачка коалиција и мнозинство, и тие имаат директна обврска да обезбедат непречено функционирање на Собранието. Но тие, во веќе виден стил, за проблемот кој самите намерно го создадоа, сега се обидуваат да ја обвинат опозицијата. Дури јас лично бев обвинета од ВМРО ДПМНЕ дека сум тактизирала за сметка на ефикасноста на работата на комисијата за труд и социјална политика.
– Тоа не е вистина и не може да помине!
– Затоа, ја информирам јавноста дека Комисијата за труд и социјална политика ќе заседава се додека не биде донесен Законот за бранители. Тоа значи, дека сите други закони од оваа сфера, каде матично тело е Комисијата за труд и социјална политика, ќе мора да чекаат претходно да биде разгледан Законот за бранители.
– Ова важи подеднакво и за законите предложени од Владата и од опозицијата. Со ваков начин на работа, а согласно Собранискиот Деловник, ќе обезбедам максимална ефикасност во работењето на Комисијата за труд и социјална политика за Законот за бранители.
– Дополнително, со ова нема да дозволам опозицијата да стане соучесник во сценариото на владините партнери за промовирање на лажен патриотизам за дневно политички потреби“, изјави Цветанка Иванова, претседател на Комисијата за труд и социјална политика.