Министерот за животна средина и просторно планирање Башким Амети денеска имаше работна средба со заменик амбасадорот на САД во Република Македонија, Микаела Швајцар Блум.
Како што информираат од Министерството, на средбата се дискутирало за соработката меѓу двете држави во областа животна средина, со посебен акцент на заштитата на амбиенталниот воздух.
На средбата било отворено и прашањето за неодамнешната одлука на Министерството за затварање на индустрискиот капацитет Југохром, што, како што се неведува, позитивно било оценето од Блум.
На средбата присуствувала Вирџинија Галински која како експерт за квалитет на амбиенталниот воздух во наредните шест недели ќе му помага на Министерството за животна средина и просторно планирање во справување со проблемите со висока концентрација на загаденост на амбиенталниот воздух, особено во зимскиот период. Од Министерството најавуваат дека таа ќе соработува и со сите други национални институции кои се инволвирани и релевантни во областа.