Стариот Градски пазар во Штип кој се наоѓа покрај коритото на реката Отиња ќе се покрие, а трговците на текстил ќе добијат и дрвени куќички за да ги продаваат своите производи.
Како што информира директорот на ЈП „Исар“ Ангел Бојаџиев, на големата тротоарна површина покрај кејот ќе се постават 20 дрвени типизирани куќички за продажба на текстилни производи.
– Поднесовме барање до Општината да ни се одобри поставување 20 дрвени тезги на овој троатоар. Тезгите ќе бидат идентични и ќе бидат изработени од дрво, ќе се отвораат нанапред и ќе имаат изложен штанд, рече Бојаџиев.
Штипското претпријатие „Исар“ ќе направи и ценовник за закуп на дрвените тезги, за кои трговците ќе можат и да конкурираат. Оваа инвестиција ќе чини околу 1.000 евра.
Бојаџиев соопшти дека во Програмата за работа на ЈП „Исар“ за 2017 година приоритетен проект е и покривањето на стариот Градски пазар, инвестиција вредна околу два милиона денари.