Децата од трите градинки на територијата на општина Центар денеска цртаа и подготвуваа вкусни оброци од здрава храна. Овој настан е во рамките на одбележувањето на Меѓународниот ден на храната.
Интерактивно-едукативната работилница е во рамките на проектот “Светски ден на здравата храна“, како акција против гладта, а темите се: “Што треба да јадеме, како и зошто“; “Ајде да правиме сочни фигури од овошје и зеленчук“ и “Цртаме за здравата храна“.
Градоначалникот на општина Центар, која е организатор на проектот, не го криеше задоволството од она што го виде и слушнс од децата.
„Голема е честа што сум овде со вас, да го одбележиме 16-ти октомври, “Меѓународниот ден на храната”, а ние сакаме ова да биде и светски ден на здравата храна. Од градинките се почнува учењето што е здрава храна и колку е важна правилната исхрана за вашето здравје и правилен раст и развој“, рече Жерновски.
Децата од општина Центар добија пригодни подароци – полни пакети со здрава храна.
Целта на оваа активност е информирање и стекнување на знаења, формирање на здрави и правилни навики во исхраната кај најмладата популација и колку е важно децата да научат што треба да јадат, што е здрава храна и како таа влијае врз здравјето на децата.
Денеска, во готвењето на децата од градинките им асистираше и помагаше познатиот кулинар Марк Де Јонг.