Битолското Јавно обвинителство извршило увид за сообраќајната несреќа што се случи утринава во Битола, во која животот го загуби едно лице.
Сообраќајката, како што информираат од Обвинителството, се случила кога возило „фолксваген пасат“ удрил во дрво. Од силината на ударот на лице место животот го загубил совозачот, 44-годишна сопруга на возачот на автомобилот. Возачот, 49-годишен жител на Крани, преспанско, со тешки повреди е пренесен во болница за добивање медицинска помош.
Јавен обвинител заедно со екипи од МВР извршил увид на лице место и издал наредби за земање крв и урина од возачот, за сообраќајно техничко вештачење, како и за вршење обдукција на телото на починатата.