Грчкиот премиер Алексис Ципрас денеска е домаќин на лидерите на медитерански земји – членки на Европската унија, на таканарчен самит ЕУМед во Атина на кој ќе учествуваат функционери од Франција, Италија, Португалија, Малта, Кипар и Шпанија.
На самитот ќе се разговара за економска политика, миграција и безбедност, а очекувањата се дека на состаноците ќе се зајакнат врските меѓу јужноевропските медитерански земји пред самитот на лидерите на ЕУ кој ќе се одржи следната недела во Братислава.
Покрај грчкиот премиер, на средбата ќе присуствуваат и претседателот на Кипар Никос Анастасиадис, францускиот претседател Франсоа Оланд, италијанскиот премиер Матео Ренци, малтешкиот премиер Џозеф Мускат и португалскиот премиер Антонио Коста, додека Шпанија ќе ја претставува државниот секретар за европски прашања Фернандо Егуидазу.
Според владини извори, во однос на економска политика, Грција ќе побара мерки за раст, намeсто за штедење, подобро искористување на фондовите на ЕУ и заштита на правата на работниците. Во врска со прашањето за миграцијата, Атина, меѓу другото, ќе упати повик за поголема поддршка на договорот меѓу ЕУ и Турција и зајакнување на Европската служба за азил.