Фина, лесна летна торта со малини …
Потребно е:
за кората:
9 белки
18 лажици шеќер
1 лажица разблажен оцет
1 полна лажица брашно
за филот од малини:
250 мл вода + 150 мл за да го разматите пудингот
400 гр шеќер
1/2 кг свежи или замрзнати малини
3 пудинга од малина
за жолтиот фил:
1/2 л млеко
9 жолчки
9 лажици брашно
9 лажици шеќер
1 ванилин шеќер
1 маргарин
за ганаш кремот:
200 мл слатка павлака
200 гр чоколадо за готвење
и уште:
300 мл слатка павлака
Подготовка:
– Белките изматете ги во густ шлаг со постепено додавање на шеќерот. Додадете 1 лажица разблажен оцет и кратко изматете. На крај додадете и 1 лажица брашно и измешајте со дрвена лажица.
– Калап за торта со дијаметар од 26 см обложерте го со хартија за печење. Сипете го изматениот шлаг и рамномерно распоредете го.
– Ставете да се пече во загреана рерна на 160 целзиусови степени околу 60 минути.
– Додека се пече кората преминете на подготовка на филот од малини. Во еден сад на рингла ставете ги водата и шеќерот и оставете да провријат. Варете ги 3-4 минути.
– Во тоа додадете 1/2 кг малини и варете уште 5 минути.
– За тоа време разматете го прашокот за пудинг со 150 мл вода и додадете го кај малините. Кратко варете го со постојано мешање додека да се свари пудингот.
– Извадете ја кората од калапот и ставете ја на чинија за сервирање. Ставете го обрачот на калапот на кората.
– Уште врелиот фил од малини рамномерно распоредете го на кората. оставете да се лади додека го подготвувате жолтиот фил.
– Ставете го млекото да се вари. Изматете ги жолчките со шеќерот и додадете ги ванилиниот шеќер и брашното. Оваа смеса сипете ја во млекото и варете со постојано мешање додека да се згусне. Оставете да се излади и од време на време измешајте го со лажица за да не се фати коричка на површината. Додадете го и маргаринот и убаво измешајте додека да се растопи.
– Готовиот жолт фил рамномерно премачкајте го над филот со малини.
– Сега преминете на подготовка на ганаш кремот. Во сад на рингла загрејте ја слатката павлака, додадете го чоколадото искршено на парчиња и мешајте додека да се истопи чоколадото и да добиете хомогена смеса. Тргнете го садот на страна и оставете да се излади кремот околу 5 минути. Потоа распоредете го над жолтиот фил.
– Слатката павлака изматете ја во густ шлаг и премачкајте ја целата торта или украсете ја со шлагот по желба. Можете одозгора да изрендате чоколадо и да украсите и со цели малини.
– Убаво изладете ја во фрижидер пред да ја послужите.