Претседателот на СДСМ, Зоран Заев придружуван од партиска делегација денеска се сретна со германскиот пратеник и член на комисијата за надворешна политика на Бундестагот, Јосип Јуратовиќ, со кого разговараше за актуелната политичка ситуација во Македонија и излезните решенија од политичката криза.
На средбата е констатирано дека во Македонија се владее преку политики што не се во согласност со демократските вредности, што се одразува штетно врз животот на граѓаните.
– Стабилноста на Македонија зависи од полн легитимитет на новата Влада што граѓаните мора да ја изберат на регуларни и демократски избори – рече претседателот на СДСМ, Зоран Заев.
Тој објасни дека СДСМ е цврсто посветена на наоѓање решенија за двата клучни услова за регуларни избори, доверлив Избирачки список и обезбедување објективно известување на медиумите.
– Македонија повеќе изборни циклуси е заложник на криминални избори што ги спроведувала актуелната власт. Уште едни такви избори нема да има. Груевски и ВМРО-ДПМНЕ не се подготвени да излезат на фер избори, тие бегаат од фер избори, се плашат од фер избори и затоа свесно го одолговлекуваат процесот на изнаоѓање решенија за кризата – рече претседателот Заев.
На средбата беше истакнато дека врвот на власта и нејзините соработници во страв од правдата се обидуваат и да ја опструираат работата на Специјалното јавно обвинителство, за што користат недозволиви притисоци врз судството и Уставниот суд.
– Затоа демократската јавност е на улиците преку мирните протести што СДСМ ги поддржува и од тие протести ја испраќаме пораката дека власта се враќа во рацете на граѓаните, а секој кој се огрешил пред законите и Уставот мора да ја понесе својата одговорност – додаде Заев.
Состанокот во голем дел беше посветен и на Програмата на СДСМ, на мерките што ќе придонесат кон кревање на животниот стандард на граѓаните преку враќање на парите кон граѓаните и реални и стабилни економско-социјални политки.