Одбојкарската репрезентација на Македонија, синоќа, во пет сета во СЦ „Борис Трајковски“ во Скопје успеа да ја победи Албанија со 3:2 (23:25; 25:23; 20:25; 25:18; 15:10) во сетови, откако противникот водеше со 1:0 и со 2:1 во сетови. Со оваа победа нашите одбојкари се практично пред пласман на завршниот турнир од Европската лига во Варна.
Во првиот натпревар од вториот турнир од групата А од Европската лига Бугарија ја победи Данска со 3:1 во сетови и со тоа ги намали шансите на Данска да биде пласирана пред Македонија. Воедно тоа беше можност селекторот на Македонија Жарко Ристоски на дуелот со Албанија да испроба и други комбинации за дуелите што ќе претстојат. Тоа го искористи ривалот и со добра игра имаше водство во два наврати.
Сепак, во последните два сета македонските одбојкари ја потврдија играта од првиот турнир од Варна и без проблеми стигнаа до победата. Во тој дел од играта најдобар на теренот беше нашиот капитен Никола Ѓоргиев, а во тимот се врати и Јовица Симовски.
Македонија е прва во групата со скор 4-0 (победи-порази), пред Бугарија која има скор 3-1, следи Данска со 1-3, а Албанија е последна со 0-4.
Денеска во СЦ „Борис Трајковски“ ќе се играат дуелите од 2. коло: Бугарија-Албанија (17 часот) и Македонија-Данска (19:30 часот).