Долгот на Грција останува значителна пречка за развојот на земјата, смета Европската комисија во својот извештај за состојбата на грчката економија, дополнувајќи дека неопходен услов за олеснување на грчкиот долг е правилна примена на програмата за реформи, пишува економското издание на „Нафтемборики”.
Според Еврокомисијата отпорноста на грчкиот долг може да се постигне со примена на сигурна програма за структурни промени, а исто така и со дополнителни мерки за негово ублажување.
Како клучен елемент за постигнување на одржливост на долгот, Комисијата ја посочува потребата од реализација на структурни реформи, од реструктуирање на државната администрација и од создавање на позитивна инвестициска клима, пренесува БТА.
Еврокомисијата доаѓа до заклучок дека бруто домашниот производ на Грција и нејзиниот долг биле прилично оптоварени од примената на спасувачките програми за земјата во периодот 2010-2014 година.
Во врска со тоа се проценува дека грчката економија се намалила за 25 отсто од 2008 година до 2015 година, што ја засилило динамиката на долгот и придонесе за повторно разгорување на кризата.
Јавниот долг на Грција се зголеми од 109,3 отсто од БДП во 2008 година до 180,2 отсто од БДП во 2015 година, и покрај значителното реструктуирање, додека како процент од БДП долгот значително ги надмина целите на програмата, се вели во извештајот на Еврокомисијата.